ԿՈՆՎԵՆՑԻԱ

ԿՈՆՎԵՆՑԻԱ
ՄԱՐԴՈՒ ԻՐԱՎՈՒՆՔՆԵՐԻ ԵՎ ՀԻՄՆԱԿԱՆ
ԱԶԱՏՈՒԹՅՈՒՆՆԵՐԻ ՊԱՇՏՊԱՆՈՒԹՅԱՆ ՄԱՍԻՆ

(1950թ. նոյեմբերի 4)
Կից արձանագրություններով
Սույն Կոնվենցիան ստորագրած կառավարությունները, լինելով Եվրոպայի խորհրդի անդամներ,
ուշադրության առնելով 1948թ. դեկտեմբերի 10-ին Միավորված ազգերի կազմակերպության Գլխավոր
ասամբլեայի հռչակած Մարդու իրավունքների համընդհանուր հռչակագիրը,
նկատի ունենալով, որ Հռչակագիրը նպատակ ունի ապահովելու այնտեղ հռչակված իրավունքների
համընդհանուր և արդյունավետ ճանաչումն ու պահպանումը,
նկատի ունենալով, որ Եվրոպայի խորհրդի նպատակն իր անդամների միջև առավել մեծ միասնության
ձեռք բերումն է և որ այդ նպատակին հասնելու միջոցներից են մարդու իրավունքների ու հիմնական
ազատությունների հաստատումը և հետագա իրականացումը,
կրկին հավաստելով իրենց խորին հավատարմությունը այդ հիմնական ազատություններին, որոնք
արդարության ու խաղաղության հիմքն են աշխարհում և որոնց լավագույն պահպանումը հիմնականում
կախված է, մի կողմից, քաղաքական արդյունավետ ժողովրդավարությունից և, մյուս կողմից, մարդու՝
դրանց վերաբերող իրավունքների համընդհանուր ըմբռնումից ու կիրառումից,
որպես միասնական հայացքներ և քաղաքական ավանդույթների, իդեալների, ազատության և իրավական
պետության ընդհանուր ժառանգություն ունեցող եվրոպական երկրների կառավարություններ համակված
լինելով Համընդհանուր հռչակագրում ամրագրված որոշ իրավունքների հավաքական իրականացման
ճանապարհին առաջին քայլերն անելու վճռականությամբ,
համաձայնեցին ներքոհիշյալի շուրջ.
Հոդված 1
Մարդու իրավունքները հարգելու պարտականությունը
Բարձր պայմանավորվող կողմերն իրենց իրավազորության ներքո գտնվող յուրաքանչյուրի համար
ապահովում են այն իրավունքներն ու ազատությունները, որոնք սահմանված են սույն Կոնվենցիայի I
բաժնում:
ԲԱԺԻՆ I.
Իրավունքներ և ազատություններ
Հոդված 2
Կյանքի իրավունք
1. Յուրաքանչյուրի կյանքի իրավունքը պաշտպանվում է օրենքով:
Ոչ ոքի չի կարելի դիտավորությամբ զրկել կյանքից այլ կերպ, քան ի կատարումն դատարանի կայացրած
դատավճռի այն հանցագործության համար, որի կապակցությամբ օրենքով նման պատիժ է
նախատեսված:
2. Կյանքից զրկելը չի համարվում սույն հոդվածի խախտում, եթե այն հետևանք է ուժի գործադրման, ինչը
միանգամայն անհրաժեշտ է՝
a. ցանկացած անձի անօրինական բռնությունից պաշտպանելու համար,
a. օրինական կալանավորում իրականացնելու կամ օրինական հիմքերով ձերբակալված
անձի փախուստը կանխելու համար,
c. խռովությունը կամ ապստամբությունը օրենքին համապատասխան ճնշելու համար:
Հոդված 3
Խոշտանգումների արգելում
Ոչ ոք չպետք է ենթարկվի խոշտանգումների կամ անմարդկային կամ արժանապատվությունը
նվաստացնող վերաբերմունքի կամ պատժի:
Հոդված 4
Ստրկության և հարկադիր աշխատանքի արգելում
1. Ոչ ոք չպետք է պահվի ստրկության մեջ կամ անազատ վիճակում:
1. Ոչ ոք չպետք է պարտադրվի կատարելու պարտադիր կամ հարկադիր աշխատանք:
3. Սույն հոդվածի նպատակների համար «պարտադիր կամ հարկադիր աշխատանք» հասկացությունը չի
ներառում՝
a. ցանկացած աշխատանք, որը սովորաբար պահանջվում է կատարել սույն Կոնվենցիայի 5-
րդ հոդվածի դրույթների համաձայն կալանքի տակ գտնվելու կամ նման կալանքից
պայմանականորեն ազատված լինելու ընթացքում,
b. զինվորական բնույթի ցանկացած ծառայություն, իսկ այն երկրներում, որտեղ օրինական է ճանաչվում
զինվորական ծառայությունից հրաժարվելը համոզմունքներից ելնելով՝ պարտադիր զինվորական
ծառայության փոխարեն նշանակված ծառայությունը,
c. ցանկացած ծառայություն, որը պարտադիր է բնակչության կյանքին կամ բարեկեցությանն սպառնացող
արտակարգ դրության կամ աղետի դեպքում,
d. ցանկացած աշխատանք կամ ծառայություն, որ դասվում է սովորական քաղաքացիական
պարտականությունների շարքը:
Հոդված 5
Ազատության և անձնական անձեռնմխելիության իրավունք
1. Յուրաքանչյուր ոք ունի ազատության և անձնական անձեռնմխելիության իրավունք: Ոչ ոքի չի կարելի
ազատությունից զրկել այլ կերպ, քան հետևյալ դեպքերում և օրենքով սահմանված կարգով՝
a.անձին օրինական կերպով կալանքի տակ պահելը իրավասու դատարանի կողմից նրան
դատապարտելուց հետո,
b. անձի օրինական ձերբակալումը կամ կալանավորումը դատարանի օրինական կարգադրությանը
չենթարկվելու համար կամ օրենքով նախատեսված ցանկացած պարտավորության կատարումն
ապահովելու նպատակով,
c. անձի օրինական կալանավորումը կամ ձերբակալումը՝ հանցագործություն կատարած լինելու
հիմնավոր կասկածի առկայության դեպքում նրան իրավասու օրինական մարմնին ներկայացնելու
նպատակով, կամ այն դեպքում, երբ դա հիմնավոր կերպով անհրաժեշտ է համարվում նրա կողմից
հանցագործության կատարումը կամ այն կատարելուց հետո նրա փախուստը կանխելու համար,
d. անչափահասին կալանքի վերցնելը օրինական կարգադրության հիման վրա՝ դաստիարակչական
հսկողության համար, կամ նրա օրինական կալանավորումը՝ նրան իրավասու մարմնին ներկայացնելու
նպատակով,
e. անձանց օրինական կալանքի վերցնելը՝ վարակիչ հիվանդությունների տարածումը կանխելու
նպատակով, ինչպես նաև հոգեկան հիվանդներին, գինեմոլներին կամ թմրամոլներին կամ
թափառաշրջիկներին օրինական կալանքի վերցնելը,
f. անձի օրինական կալանավորումը կամ ձերբակալումը՝ նրա անօրինական մուտքը երկիր կանխելու
նպատակով, կամ այն անձի օրինական կալանավորումը կամ ձերբակալումը, որի դեմ միջոցներ են
ձեռնարկվում նրան արտաքսելու կամ հանձնելու նպատակով:
2. Յուրաքանչյուր ձերբակալված իրեն հասկանալի լեզվով անհապաղ տեղեկացվում է իր ձերբակալման
պատճառների և ներկայացվող ցանկացած մեղադրանքի մասին:
3.Սույն հոդվածի 1-ի կետի (c) ենթակետի դրույթներին համապատասխան ձերբակալված կամ
կալանավորված յուրաքանչյուր ոք անհապաղ տարվում է դատավորի կամ այլ պաշտոնատար անձի մոտ,
որն օրենքով լիազորված է իրականացնելու դատական գործառույթներ, և ունի ողջամիտ ժամկետում
դատաքննության իրավունք կամ մինչև դատաքննությունն ազատ արձակվելու իրավունք: Ազատ
արձակումը կարող է պայմանավորվել դատաքննության ներկայանալու երաշխիքներով:
4. Յուրաքանչյուր ոք, ով ձերբակալման կամ կալանավորման պատճառով զրկված է ազատությունից,
իրավունք ունի վիճարկելու իր կալանավորման օրինականությունը, որի կապակցությամբ դատարանն
անհապաղ որոշում է կայացնում և կարգադրում է նրան ազատ արձակել, եթե կալանավորումն
անօրինական է:
5. Յուրաքանչյուր ոք, ով, ի խախտումն սույն հոդվածի դրույթների, ձերբակալման կամ կալանավորման
զոհ է դարձել, իրավունք ունի հայցի ուժով օժտված փոխհատուցման:
Հոդված 6
Արդարացի դատաքննության իրավունք
1. Յուրաքանչյուր ոք, երբ որոշվում են նրա քաղաքացիական իրավունքներն ու պարտականությունները,
կամ նրան ներկայացված ցանկացած քրեական մեղադրանքի քննարկման դեպքում, ունի օրենքի հիման
վրա ստեղծված անկախ ու անաչառ դատարանի կողմից ողջամիտ ժամկետում արդարացի և
հրապարակային դատաքննության իրավունք: Դատավճիռը հրապարակվում է դռնբաց նիստում, սակայն
մամուլի ներկայացուցիչներին և հանրությանը կարող էն չթույլատրվել ներկա լինելու ամբողջ
դատաքննությանը կամ նրա մի մասին՝ բարոյականության, հասարակական կարգի կամ
ժողովրդավարական հասարակության մեջ պետական անվտանգության շահերից ելնելով, եթե դա են
պահանջում անչափահասների շահերը կամ կողմերի մասնավոր կյանքի պաշտպանությունը, կամ
այնքանով, որքանով դա, դատարանի կարծիքով, հատուկ հանգամանքների բերումով խիստ անհրաժեշտ
է, եթե հրապարակայնությունը կխախտեր արդարադատության շահերը:
2. Յուրաքանչյուր ոք, ով մեղադրվում է քրեական հանցագործություն կատարելու մեջ, համարվում է
անմեղ, քանի դեռ նրա մեղավորությունն ապացուցված չէ օրենքին համապատասխան:
3. Քրեական հանցագործություն կատարելու մեջ մեղադրվող յուրաքանչյուր ոք ունի առնվազն հետևյալ
իրավունքները՝
a. իրեն հասկանալի լեզվով անհապաղ ու հանգամանորեն տեղեկացվելու իրեն ներկայացված
մեղադրանքի բնույթի և հիմքի մասին,
b. բավարար ժամանակ ու հնարավորություններ ունենալու իր պաշտպանությունը նախապատրաստելու
համար,
c. պաշտպանելու իրեն անձամբ կամ իր ընտրած դատապաշտպանի միջոցով կամ, եթե նա բավարար
միջոցներ չունի դատապաշտպանի ծառայությունների դիմաց վճարելու համար, ունենալու անվճար
նշանակված դատապաշտպան, երբ դա պահանջում են արդարադատության շահերը,
d. հարցաքննելու իր դեմ ցուցմունքներ տվող վկաներին կամ իրավունք ունենալու, որ այդ վկաները
ենթարկվեն հարցաքննության, և իրավունք ունենալու իր վկաներին կանչելու ու հարցաքննելու նույն այն
պայմաններով, ինչ իր դեմ ցուցմունք տված վկաները,
e. օգտվելու թարգմանչի անվճար օգնությունից, եթե ինքը չի հասկանում դատարանում գործածվող լեզուն
կամ չի խոսում այդ լեզվով։
Հոդված 7
Պատիժ՝ բացառապես օրենքի հիման վրա
1.Ոչ ոք չպետք է մեղավոր ճանաչվի որևէ գործողության կամ անգործության համար, որը կատարման
պահին գործող ներպետական կամ միջազգային իրավունքի համաձայն, հանցագործություն չի համարվել։
Չի կարող նաև նշանակվել ավելի ծանր պատիժ, քան այն, որը կիրառելի է եղել հանցագործության
կատարման պահին։
2. Սույն հոդվածը չի խոչընդոտում ցանկացած անձի դատի տալ և պատժել որևէ գործողության կամ
անգործության համար, որը կատարվելու պահին, քաղաքակիրթ ազգերի կողմից ճանաչված իրավունքի
ընդհանուր սկզբունքներին համապատասխան, համարվել է հանցագործություն:
Հոդված 8
Անձնական և ընտանեկան կյանքը հարգելու իրավունք
1. Յուրաքանչյուր ոք ունի իր անձնական ու ընտանեկան կյանքի, բնակարանի և նամակագրության
նկատմամբ հարգանքի իրավունք։
2. Չի թույլատրվում պետական մարմինների միջամտությունն այդ իրավունքի իրականացմանը,
բացառությամբ այն դեպքերի, երբ դա նախատեսված է օրենքով և անհրաժեշտ է ժողովրդավարական
հասարակությունում՝ ի շահ պետական անվտանգության, հասարակական կարգի կամ երկրի
տնտեսական բարեկեցության, ինչպես նաև անկարգությունների կամ հանցագործությունների կանխման,
առողջության կամ բարոյականության պաշտպանության կամ այլ անձանց իրավունքների և
ազատությունների պաշտպանության նպատակով։
Հոդված 9
Մտքի, խղճի և կրոնի ազատություն
1.Յուրաքանչյուր ոք ունի մտքի, խղճի և կրոնի ազատության իրավունք. այս իրավունքը ներառում է իր
կրոնը կամ համոզմունքները փոխելու ազատությունը և դրանք ինչպես միայնակ, այնպես էլ այլոց հետ
համատեղ և հրապարակավ կամ մասնավոր կարգով, քարոզի, եկեղեցական արարողությունների և
պաշտամունքի այլ ծիսակատարությունների միջոցով արտահայտելու ազատությունը։
2. Սեփական կրոնը կամ համոզմունքները դավանելու ազատությունը ենթակա է միայն այնպիսի
սահմանափակումների, որոնք սահմանված են օրենքով և անհրաժեշտ են ժողովրդավարական
հասարակությունում՝ ի պաշտպանություն հասարակական անվտանգության, հասարակական կարգի,
առողջության կամ բարոյականության կամ այլ անձանց իրավունքների և ազատությունների։
Հոդված 10
Կարծիք արտահայտելու ազատություն
Յուրաքանչյուր ոք ունի սեփական կարծիքն ազատորեն արտահայտելու իրավունք։ Այս իրավունքը
ներառում է իր կարծիքը պնդելու, տեղեկություններ և գաղափարներ ստանալու և տարածելու
ազատությունը՝ առանց պետական մարմինների միջամտության և անկախ պետական սահմաններից։ Այս
հոդվածը պետություններին չի խոչընդոտում սահմանելու ռադիոհաղորդումների, հեռուստատեսային
կամ կինեմատոգրաֆիական ձեռնարկությունների լիցենզավորում։
2. Այդ ազատությունների իրականացումը, որը պարտավորություններ և պատասխանատվություն է
ենթադրում, կարող է պայմանավորվել այնպիսի ձևականություններով, պայմաններով,
սահմանափակումներով կամ պատժամիջոցներով, որոնք նախատեսված են օրենքով և անհրաժեշտ են
ժողովրդավարական հասարակությունում՝ ի շահ պետական անվտանգության, տարածքային
ամբողջականության կամ հասարակական անդորրի, անկարգությունները կամ հանցագործությունները
կանխելու, առողջությունը կամ բարոյականությունը, ինչպես և այլ անձանց հեղինակությունը կամ
իրավունքները պաշտպանելու, խորհրդապահական բնույթի տեղեկատվության հրապարակումը
կանխելու կամ արդարադատության հեղինակությունն ու անաչառությունը պահպանելու նպատակով։
Հոդված 11
Հավաքների և միավորումների ազատություն
1. Յուրաքանչյուր ոք ունի խաղաղ հավաքների ազատության և այլոց հետ միավորվելու ազատության
իրավունք, ներառյալ իր շահերի պաշտպանության համար արհմիություններ ստեղծելու և դրանց
անդամակցելու իրավունքը։
2. Այդ իրավունքների իրականացումը ենթակա չէ որևէ սահմանափակման, բացի նրանցից, որոնք
նախատեսված են օրենքով և անհրաժեշտ են ժողովրդավարական հասարակությունում՝ ի շահ պետական
անվտանգության կամ հասարակական անդորրի, անկարգությունները կամ հանցագործությունները
կանխելու, առողջությունը կամ բարոյականությունը պաշտպանելու կամ այլ անձանց իրավունքներն ու
ազատությունները պաշտպանելու նպատակով: Սույն հոդվածը չի խոչընդոտում օրինական
սահմանափակումներ նախատեսելուն զինված ուժերի, ոստիկանության և պետական վարչակազմի մեջ
մտնող անձանց կողմից այդ իրավունքների իրականացման նկատմամբ:
Հոդված 12
Ամուսնության իրավունք
Ամուսնական տարիքի հասած տղամարդիկ ու կանայք ունեն ամուսնանալու և ընտանիք կազմելու
իրավունք՝ այդ իրավունքի իրականացումը կարգավորող ներպետական օրենսդրությանը
համապատասխան:
Հոդված 13
Իրավական պաշտպանության արդյունավետ միջոցների իրավունք
Յուրաքանչյուր ոք, ում՝ սույն Կոնվենցիայով ամրագրված իրավունքներն ու ազատությունները
խախտվում են, ունի պետական մարմինների առջև իրավական պաշտպանության արդյունավետ
միջոցների իրավունք, նույնիսկ, եթե նման խախտումը կատարել են ի պաշտոնե գործող անձինք:
Հոդված 14
Խտրականության արգելում
Սույն Կոնվենցիայում շարադրված իրավունքներից և ազատություններից օգտվելը ապահովվում է
առանց խտրականության, այն է՝ անկախ սեռից, ռասայից, մաշկի գույնից, լեզվից, կրոնից, քաղաքական
կամ այլ համոզմունքներից, ազգային կամ սոցիալական ծագումից, ազգային փոքրամասնությանը
պատկանելուց, գույքային դրությունից, ծննդից կամ այլ դրությունից:
Հոդված 15
Արտակարգ իրավիճակներում պարտավորություններից շեղում
1. Պատերազմի կամ ազգի կյանքին սպառնացող այլ արտակարգ դրության ժամանակ, ցանկացած Բարձր
պայմանավորվող կողմ կարող է ձեռնարկել միջոցառումներ ի շեղումն սույն Կոնվենցիայով ամրագրված
իր պարտավորությունների միայն այնքանով, որքանով դա պահանջում է դրության լարվածությունը,
պայմանով, որ նման միջոցառումներն անհամատեղելի չեն միջազգային իրավունքով ստանձնած նրա
մյուս պարտավորությունների հետ:
2. Այս դրույթը չի կարող հիմք ծառայել շեղվելու 2-րդ հոդվածից, բացառությամբ պատերազմական
օրինական գործողությունների հետևանքով մարդկային զոհերը, կամ 3, 4 (1), և 7-րդ հոդվածների
դրույթներից:
3. Ցանկացած Բարձր պայմանավորվող կողմ, օգտագործելով շեղվելու այդ իրավունքը, Եվրոպայի
խորհրդի Գլխավոր քարտուղարին լիարժեքորեն իրազեկում է իր կիրառած միջոցառումների և դրանք
կիրառելու դրդապատճառների մասին: Եվրոպայի խորհրդի Գլխավոր քարտուղարը ծանուցվում է նաև
այդ միջոցառումների գործողությունը դադարեցնելու և Կոնվենցիայի դրույթների լիակատար
իրագործումը վերսկսելու մասին:
Հոդված 16
Օտարերկրացիների քաղաքական գործունեության սահմանափակում
Բարձր պայմանավորվող կողմերի համար 10, 11 և 14-րդ հոդվածներում ոչինչ չի կարող խոչընդոտ
համարվել օտարերկրացիների քաղաքական գործունեության կապակցությամբ սահմանափակումներ
նախատեսելու ուղղությամբ:
Հոդված 17
Իրավունքների չարաշահման արգելում
Սույն Կոնվենցիայի ոչ մի դրույթ չի կարող մեկնաբանվել այն իմաստով, թե որևէ պետություն, անձանց
խումբ կամ որևէ անձ իրավունք ունի զբաղվելու այնպիսի գործունեությամբ կամ կատարելու այնպիսի
գործողություն, որն ուղղված է սույն Կոնվենցիայում շարադրված ցանկացած իրավունքի և ազատության
վերացմանը կամ դրանց սահմանափակմանը ավելի մեծ չափով, քան նախատեսված է Կոնվենցիայով:
Հոդված 18
Իրավունքների նկատմամբ սահմանափակումների կիրառման սահմանները
Նշված իրավունքների և ազատությունների՝ սույն Կոնվենցիայով թույլատրվող սահմանափակումները
չեն կիրառվում որևէ այլ նպատակով, բացի այն, որի համար դրանք նախատեսվել են:
ԲԱԺԻՆ II.
Մարդու իրավունքների եվրոպական դատարան
Հոդված 19
Դատարանի հիմնումը
Սույն Կոնվենցիայով և նրան կից արձանագրություններով Բարձր պայմանավորվող կողմերի ստանձնած
պարտավորությունների կատարումն ապահովելու համար հիմնվում է Մարդու իրավունքների
եվրոպական դատարան (այսուհետև՝ Դատարան): Այն գործում է մշտական հիմունքներով:
Հոդված 20
Դատավորների թիվը
Դատարանի կազմի մեջ մտնող դատավորների թիվը հավասար է Բարձր պայմանավորվող կողմերի
թվին:
Հոդված 21
Դատավորներին ներկայացվող պահանջները
1. Դատավորները պետք է օժտված լինեն բարոյական բարձր հատկանիշներով և բավարարեն դատական
բարձր պաշտոններում նշանակվելիս ներկայացվող պահանջները կամ լինեն հանրաճանաչ
հեղինակություն վայելող իրավագետներ։
2. Դատավորները Դատարանի աշխատանքին մասնակցում են անձնապես։
3. Պաշտոնավարության ժամկետի ընթացքում դատավորները չպետք է իրականացնեն որևէ
գործունեություն, որն անհամատեղելի է նրանց անկախության, անաչառության կամ նրանց
լիազորությունների մշտական բնույթից բխող պահանջների հետ. սույն կետի դրույթների կիրառման
առնչությամբ ծագող հարցերը լուծում է Դատարանը։
Հոդված 22
Դատավորների ընտրությունները
1. Յուրաքանչյուր Բարձր պայմանավորվող կողմից դատավորներն ընտրվում են Խորհրդարանական
վեհաժողովում, նրանց օգտին տրված քվեների մեծամասնությամբ, Բարձր պայմանավորվող կողմի
առաջադրած երեք թեկնածուների ցուցակից։
2. Նույն ընթացակարգը կիրառվում է նոր Բարձր պայմանավորվող կողմի միանալու դեպքում
Դատարանի կազմը, ինչպես և առաջացած թափուր տեղերը համալրելիս։
Հոդված 23
Պաշտոնավարության ժամկետը
1.Դատավորներն ընտրվում են վեց տարվա ժամկետով։ Նրանք կարող են վերընտրվել։ Սակայն, առաջին
ընտրության ժամանակ ընտրված դատավորների կեսի պաշտոնավարության ժամկետը երեք տարի է։
2. Առաջին երեք տարվա ժամկետի ավարտին պաշտոնաթողության ենթակա դատավորները որոշվում են
նրանց ընտրվելուց անմիջապես հետո՝ Եվրոպայի խորհրդի Գլխավոր քարտուղարի կողմից անցկացվող
վիճակահանությամբ։
3. Յուրաքանչյուր երեք տարին մեկ, Դատարանի կազմի, ըստ հնարավորին, կիսով չափ նորացումն
ապահովելու նպատակով, Խորհրդարանական վեհաժողովը կարող է, մինչև ցանկացած հաջորդ
ընտրություններն անցկացնելը, որոշում ընդունել, որ մեկ կամ մի քանի ընտրվող դատավորների
պաշտոնավարության ժամկետը կամ ժամկետները լինեն այլ, քան վեց տարին է, բայց ամեն դեպքում ոչ
ավելի, քան ինը և ոչ պակաս, քան երեք տարի։
4. Այն դեպքերում, երբ խոսքը վերաբերում է պաշտոնավարության ավելի քան մեկ ժամկետի, և
Խորհրդարանական վեհաժողովը կիրառում է նախորդ կետի դրույթները, պաշտոնավարության ժամկետը
որոշում է Եվրոպայի խորհրդի Գլխավոր քարտուղարն՝ ընտրություններից անմիջապես հետո
անցկացվող վիճակահանությամբ։
5. Այն դատավորը, որն ընտրվել է մեկ այլ, պաշտոնավարության ժամկետը դեռևս չլրացած դատավորի
փոխարինելու համար, այդ պաշտոնն զբաղեցնում է նախորդ դատավորի լիազորությունների ժամկետից
մնացած ժամանակահատվածում։
6.Դատավորների պաշտոնավարության ժամկետն ավարտվում է, երբ լրանում է նրանց 70 տարին։
7. Դատավորները պաշտոնավարում են մինչև փոխարինվելը։ Նրանք, սակայն, փոխարինվելուց հետո,
շարունակում են քննել իրենց կողմից արդեն իսկ քննության առնված գործերը։
Հոդված 24
Պաշտոնից հեռացնելը
1. Դատավորը պաշտոնից կարող է հեռացվել միայն այն դեպքում, եթե մյուս դատավորները քվեների
երկու երրորդի մեծամասնությամբ որոշում են ընդունում այն մասին, որ նա այլևս չի
համապատասխանում ներկայացվող պահանջներին։
Հոդված 25
Գրասենյակը և իրավական հարցերով քարտուղարները
Դատարանն ունի Գրասենյակ, որի գործառույթներն ու կազմակերպումը սահմանվում են Դատարանի
ընթացակարգի կանոններով։ Դատարանն օգտվում է իրավական հարցերով քարտուղարների
ծառայություններից։
Հոդված 26
Դատարանի լիագումար նիստերը
Լիագումար նիստերում Դատարանը՝
a. ընտրում է իր Նախագահին և Նախագահի մեկ կամ երկու տեղակալի երեք տարի ժամկետով. նրանք
կարող են վերընտրվել,
b. ձևավորում է Պալատներ, որոնք ստեղծվում են որոշակի ժամկետով,
c. ընտրում է Դատարանի պալատների նախագահներ. նրանք կարող են վերընտրվել,
d. ընդունում է Դատարանի ընթացակարգի կանոնները,
e. ընտրում է Քարտուղար և Քարտուղարի մեկ կամ մի քանի տեղակալ։
Հոդված 27
Կոմիտեները, Պալատները և Մեծ պալատը
1. Իրեն հանձնված գործերը քննելու համար Դատարանը նիստեր գումարում է երեք դատավորից
կազմված կոմիտեներում, յոթ դատավորից կազմված Պալատներում և տասնյոթ դատավորից կազմված
Մեծ պալատում։ Դատարանի Պալատները որոշակի ժամկետով կազմում են կոմիտեներ։
2.Շահագրգիռ մասնակից կողմից ընտրված դատավորը Պալատի և Մեծ պալատի ex officio անդամ է.
նման դատավորի բացակայության դեպքում կամ եթե նա չի կարող մասնակցել նիստին, տվյալ
պետությունը նշանակում է որևէ այլ անձի, որը հանդես է գալիս որպես դատավոր։
3. Մեծ պալատի կազմի մեջ մտնում են նաև Դատարանի նախագահը, Դատարանի նախագահի
տեղակալները, Պալատների նախագահները և Դատարանի այլ դատավորներ, որոնք ընտրվում են
Դատարանի ընթացակարգի կանոններին համապատասխան՝ Երբ գործը 43-րդ հոդվածի դրույթներին
համապատասխան հանձնվում է Մեծ պալատ, որևէ դատավոր, որն ընդգրկված է եղել որոշում կայացրած
Պալատում, չի կարող մասնակցել Մեծ պալատի նիստերին բացառությամբ վերոնշյալ Պալատի
նախագահի և շահագրգիռ մասնակից կողմի դատավորի:
Հոդված 28
Կոմիտեների հայտարարությունները գանգատի
անընդունելիության մասին
Կոմիտեն միաձայն որոշմամբ կարող է անընդունելի հայտարարել
34-րդ հոդվածին համապատասխան ներկայացված անհատական գանգատը կամ այն հանել քննության
ենթակա գործերի ցուցակից, եթե նման որոշում կարող է ընդունվել առանց գանգատի լրացուցիչ
ուսումնասիրման: Այդ որոշումը վերջնական է:
Հոդված 29
Պալատների որոշումները գանգատի ընդունելիության մասին և ըստ էության
1. Եթե 28-րդ հոդվածին համապատասխան որոշում չի ընդունվում, Պալատը որոշում է կայացնում 34-րդ
հոդվածին համապատասխան ներկայացված անհատական գանգատի ընդունելիության մասին և ըստ
էության:
2. Պալատը որոշում է կայացնում 33-րդ հոդվածին համապատասխան պետության ներկայացրած
գանգատի ընդունելիության մասին և ըստ գործի էության:
3. Գանգատի ընդունելիության մասին որոշումը կայացվում է առանձին, եթե դատարանը բացառության
կարգով հակառակ որոշում չի ընդունում:
Հոդված 30
Ընդդատության զիջումը Մեծ պալատին
Եթե Պալատի քննության ներքո գտնվող գործը հանգեցնում է Կոնվենցիայի կամ նրան կից
Արձանագրությունների դրույթների մեկնաբանմանն առնչվող լուրջ հարցի կամ եթե Պալատի քննության
ներքո գտնվող հարցի լուծումը կարող է հակասել Դատարանի՝ ավելի վաղ կայացրած որոշմանը,
Պալատը կարող է մինչև իր որոշումը կայացնելը ցանկացած ժամանակ ընդդատությունը զիջել Մեծ
պալատի օգտին, եթե կողմերից ոչ մեկը չի առարկում:
Հոդված 31
Մեծ պալատի լիազորությունները
Մեծ պալատը՝
a. քննության է առնում 33-րդ կամ 34-րդ հոդվածներին համապատասխան ներկայացված գանգատները,
եթե Պալատը 30-րդ հոդվածի դրույթների հիման վրա զիջել է ընդդատությունը կամ եթե գործը նրան է
հանձնվել 43-րդ հոդվածի դրույթներին համապատասխան,
b. քննության է առնում խորհրդատվական եզրակացություններ տալու մասին՝ 47-րդ հոդվածի
դրույթներին համապատասխան ներկայացված խնդրանքները:
Հոդված 32
Դատարանի իրավազորությունը
1. Դատարանի իրավազորությունը տարածվում է այն բոլոր հարցերի վրա, որոնք վերաբերում են
Կոնվենցիայի և նրան կից Արձանագրությունների դրույթների մեկնաբանմանն ու կիրառմանը և որոնք
հանձնվում են 33, 34 և 47-րդ հոդվածների դրույթներով նախատեսված դեպքերում:
2. Դատարանի իրավազորության շուրջ եղած վեճի դեպքում հարցը լուծում է Դատարանը:
Հոդված 33
Միջպետական գործեր
Ցանկացած Բարձր պայմանավորվող կողմ կարող է Դատարան դիմել Կոնվենցիայի և նրան կից
Արձանագրությունների դրույթների ցանկացած ենթադրվող խախտման հարցով, որ թույլ է տվել մեկ այլ
Բարձր պայմանավորվող կողմ:
Հոդված 34
Անհատական գանգատները
Դատարանը կարող է գանգատներ ընդունել ցանկացած անձից, ոչ կառավարական կազմակերպությունից
կամ անձանց խմբից, որոնք պնդում են, թե դարձել են սույն Կոնվենցիայով կամ նրան կից
Արձանագրություններով ճանաչված իրենց իրավունքների՝ որևէ Բարձր պայմանավորվող կողմի թույլ
տված խախտման զոհ: Բարձր պայմանավորվող կողմերը պարտավորվում են որևէ կերպ չխոչընդոտել
այդ իրավունքի արդյունավետ իրականացմանը:
Հոդված 35
Ընդունելիության պայմանները
1.Դատարանը կարող է գործը քննության ընդունել միայն այն բանից հետո, երբ սպառվել են միջազգային
իրավունքի հանրաճանաչ նորմերին համապատասխան իրավական պաշտպանության բոլոր
ներպետական միջոցները, և վերջնական որոշման կայացման օրվանից հետո վեց ամսվա ընթացքում:
2. Դատարանը քննության չի ընդունում 34-րդ հոդվածին համապատասխան ներկայացված ոչ մի
անհատական գանգատ, եթե այն՝
a. անանուն է,
b. ըստ էության այն նույն հարցն է, որը Դատարանն արդեն քննել է կամ որն արդեն հանձնվել է
միջազգային քննության կամ կարգավորման այլ ընթացակարգի և չի բովանդակում գործին առնչվող նոր
տեղեկություններ:
3. Դատարանն անընդունելի է համարում 34-րդ հոդվածին համապատասխան ներկայացված ցանկացած
անհատական գանգատ, եթե գտնում է, որ այն անհամատեղելի է սույն Կոնվենցիայի կամ նրան կից
Արձանագրությունների դրույթների հետ, կամ ակնհայտորեն անհիմն է կամ հանդիսանում է գանգատ
ներկայացնելու իրավունքի չարաշահում:
4. Դատարանը մերժում է իրեն հանձնված ցանկացած գանգատ, որն անընդունելի է համարում սույն
հոդվածին համապատասխան: Նա կարող է դա անել քննության ցանկացած փուլում:
Հոդված 36
Երրորդ կողմի մասնակցությունը
1. Պալատի կամ Մեծ պալատի կողմից քննության առնվող ցանկացած գործի կապակցությամբ
յուրաքանչյուր Բարձր պայմանավորվող կողմ, որի քաղաքացին է դիմողը, իրավունք ունի ներկայացնելու
գրավոր դիտողություններ և մասնակցելու լսումներին:
2. Ելնելով պատշաճ արդարադատություն իրականացնելու շահերից՝ Դատարանի նախագահը կարող է
ցանկացած Բարձր պայմանավորվող կողմի, որը գործի կողմ չէ, կամ ցանկացած շահագրգիռ անձի, որը
դիմող չէ, հրավիրել ներկայացնելու գրավոր դիտողություններ կամ մասնակցելու լսումներին:
Հոդված 37
Գանգատը ցուցակից հանելը
1. Դատարանը քննության ցանկացած փուլում կարող է որոշել գանգատը հանելու գործերի ցուցակից, եթե
հանգամանքները հանգեցնում են այն եզրակացության, որ՝
a. դիմողը մտադիր չէ հետամուտ լինել իր գանգատի քննությանը,
b. վեճն արդեն կարգավորվել է,
c. Դատարանի կողմից հիմք ընդունված որևէ այլ պատճառով՝ գանգատի քննությունը շարունակելն
արդարացված չէ:
Այդուհանդերձ, Դատարանը շարունակում է գանգատի քննությունը, եթե դա է պահանջում սույն
Կոնվենցիայով և նրան կից Արձանագրություններով սահմանված իրավունքների հարգումը:
2. Դատարանը կարող է որոշել գանգատը վերստին ընդգրկելու գործերի ցուցակում, եթե գտնում է, որ
դրա համար կան արդարացի հանգամանքներ:
Հոդված 38
Գործի քննությունը և բարեկամական կարգավորման ընթացակարգը
1. Եթե Դատարանը գանգատը հայտարարում է ընդունելի, նա՝
a. նախաձեռնում է գործի քննությունը կողմերի կամ նրանց ներկայացուցիչների մասնակցությամբ և, եթե
անհրաժեշտ է, իրականացնում է հետաքննություն, որի արդյունավետ իրականացման համար
շահագրգիռ պետություններն ապահովում են անհրաժեշտ բոլոր պայմանները,
b. իր ծառայությունն է տրամադրում շահագրգիռ կողմերին՝ սույն Կոնվենցիայով և նրա
Արձանագրություններով սահմանված իրավունքների պահպանման հիման վրա հարցի բարեկամական
կարգավորումն ապահովելու նպատակով։
2. 1-ին կետի (b) ենթակետին համապատասխան իրականացվող քննությունը խորհրդապահական բնույթ
է կրում։
Հոդված 39
Բարեկամական կարգավորման ձեռք բերումը
Բարեկամական կարգավորման դեպքում Դատարանը գործը հանում է իր ցուցակից՝ կայացնելով
որոշում, որտեղ տրվում է փաստերի և ձեռք բերված որոշման հակիրճ շարադրանքը։
Հոդված 40
Դռնբաց լսումները և փաստաթղթերի մատչելիությունը
1. Լսումները դռնբաց են, եթե Դատարանը բացառիկ հանգամանքներում այլ որոշում չի ընդունում։
2. Քարտուղարությանն ի պահ հանձնված փաստաթղթերը մատչելի են հանրությանը, եթե Դատարանի
նախագահը այլ որոշում չի ընդունում։
Հոդված 41
Արդարացի փոխհատուցումը
1. Եթե Դատարանը գտնում է, որ տեղի է ունեցել Կոնվենցիայի կամ նրան կից Արձանագրությունների
խախտում, իսկ համապատասխան Բարձր պայմանավորվող կողմի ներպետական իրավունքն ընձեռում է
միայն մասնակի հատուցման հնարավորություն, ապա Դատարանը, անհրաժեշտության դեպքում,
որոշում է արդարացի փոխհատուցում վճարել տուժած կողմին։
Հոդված 42
Պալատների վճիռները
Պալատների վճիռները վերջնական են դառնում 44-րդ հոդվածի 2-րդ կետի դրույթներին
համապատասխան։
Հոդված 43
Գործի հանձնումը Մեծ պալատին
1. Պալատի վճռի կայացման օրվանից հետո երեք ամսվա ընթացքում գործի ցանկացած կողմ բացառիկ
դեպքերում կարող է պահանջել, որպեսզի գործը հանձնվի Մեծ պալատին։
2. Մեծ պալատի հինգ դատավորից բաղկացած խումբն ընդունում է պահանջը, եթե գործն արծարծում է
այնպիսի լուրջ հարց, որը վերաբերում է Կոնվենցիայի կամ նրան կից Արձանագրությունների
մեկնաբանմանը կամ կիրառմանը, կամ ընդհանուր կարևորության այլ լուրջ հարց։
3. Եթե Կոմիտեն ընդունում է պահանջը, ապա Մեծ պալատը գործը լուծում է՝ վճիռ կայացնելով։
Հոդված 44
Վերջնական վճիռները
1. Մեծ պալատի վճիռը վերջնական է։
2. Պալատի վճիռը դառնում է վերջնական, եթե՝
a. կողմերը հայտարարում են, թե չեն պահանջի գործի հանձնումը Մեծ պալատին, կամ
b. վճռի կայացումից հետո երեք ամսվա ընթացքում չի պահանջվում գործի հանձնումը Մեծ պալատին,
կամ
c. Մեծ պալատի խումբը 43-րդ հոդվածին համապատասխան մերժում է գործը հանձնելու պահանջը։
3. Վերջնական վճիռը ենթակա է հրապարակման։
Հոդված 45
Վճիռների և որոշումների հիմնավորումը
1. Ինչպես վճիռները, այնպես էլ գանգատների ընդունելիության կամ անընդունելիության մասին
որոշումները պետք է լինեն հիմնավորված:
2. Եթե վճիռը ամբողջությամբ կամ մասամբ չի արտահայտում դատավորների միաձայն կարծիքը, ապա
ցանկացած դատավոր իրավունք ունի ներկայացնելու հատուկ կարծիք:
Հոդված 46
Վճիռների պարտադիր ուժն ու կատարումը
1. Բարձր պայմանավորվող կողմերը պարտավորվում են կատարել Դատարանի վերջնական վճիռներն
այն գործերի վերաբերյալ, որոնցում նրանք կողմեր են:
2. Դատարանի վերջնական վճիռն ուղարկվում է Նախարարների կոմիտե, որը վերահսկողություն է
իրականացնում նրա կատարման նկատմամբ:
Հոդված 47
Խորհրդատվական եզրակացությունները
1. Նախարարների կոմիտեի խնդրանքով Դատարանը կարող է խորհրդատվական եզրակացություններ
տալ Կոնվենցիայի և նրան կից Արձանագրությունների դրույթների մեկնաբանմանը վերաբերող
իրավական հարցերի առնչությամբ:
2. Նման եզրակացությունները չպետք է շոշափեն այն հարցերը, որոնք վերաբերում են Կոնվենցիայի I
բաժնում և նրան կից Արձանագրություններում սահմանված իրավունքների կամ ազատությունների
բովանդակությանը կամ ծավալին, կամ ցանկացած այլ հարց, որը Դատարանը կամ Նախարարների
կոմիտեն կարող էին քննարկել ցանկացած այնպիսի լսումների արդյունքում, որոնք կարող էին տեղի
ունենալ Կոնվենցիային համապատասխան:
3. Դատարանի խորհրդատվական եզրակացություն խնդրելու մասին Նախարարների կոմիտեի որոշումն
ընդունվում է կոմիտեի նիստերին մասնակցելու իրավունք ունեցող ներկայացուցիչների քվեների
մեծամասնությամբ:
Հոդված 48
Դատարանի խորհրդատվական իրավազորությունը
Դատարանը որոշում է, թե արդյոք խորհրդատվական եզրակացության համար Նախարարների կոմիտեի
ներկայացրած խնդրանքը 47-րդ հոդվածով սահմանված իր իրավասության շրջանակում է:
Հոդված 49
Խորհրդատվական եզրակացությունների հիմնավորումը
1. Դատարանի խորհրդատվական եզրակացությունները պետք է հիմնավորված լինեն:
2. Եթե խորհրդատվական եզրակացությունն ամբողջությամբ կամ մասամբ չի արտահայտում
դատավորների միաձայն կարծիքը, ապա ցանկացած դատավոր իրավունք ունի ներկայացնելու հատուկ
կարծիք:
3. Դատարանի խորհրդատվական եզրակացությունն ուղարկվում է Նախարարների կոմիտե:
Հոդված 50
Դատարանի պահպանման ծախսերը
Դատարանի գործունեության հետ կապված ծախսերը կրում է Եվրոպայի խորհուրդը:
Հոդված 51
Դատավորների արտոնություններն ու անձեռնմխելիությունը
Դատավորներն իրենց գործառույթները կատարելու ընթացքում օգտվում են Եվրոպայի խորհրդի
Կանոնադրության 40-րդ հոդվածով և դրա հիման վրա կնքված համաձայնագրերով նախատեսված
արտոնություններից ու անձեռնմխելիությունից։
Բաժին III.
Այլ դրույթներ
Հոդված 52
Գլխավոր քարտուղարի պահանջները
Յուրաքանչյուր Բարձր պայմանավորվող կողմ, ի պատասխան Եվրոպայի խորհրդի Գլխավոր
քարտուղարի պահանջի, ներկայացնում է պարզաբանումներ այն կարգի վերաբերյալ, որով իր
ներպետական իրավունքն ապահովում է Կոնվենցիայի ցանկացած դրույթի արդյունավետ
իրականացումը։
Հոդված 53
Մարդու՝ առկա իրավունքների պահպանումը
Սույն Կոնվենցիայում ոչինչ չի կարող մեկնաբանվել որպես մարդու այն իրավունքների և հիմնական
ազատությունների սահմանափակում կամ նվազեցում, որոնք կարող են երաշխավորվել ցանկացած
Բարձր պայմանավորվող կողմի օրենսդրությամբ կամ նրա մասնակցությամբ որևէ այլ համաձայնագրով:
Հոդված 54
Նախարարների կոմիտեի լիազորությունները
Սույն Կոնվենցիայում ոչինչ ի վնաս չէ Նախարարների կոմիտեի լիազորություններին, որոնք նրան
վերապահված են Եվրոպայի խորհրդի Կանոնադրությամբ:
Հոդված 55
Վեճերի կարգավորման այլ միջոցներից հրաժարվելը
Բարձր պայմանավորվող կողմերը համաձայնում են, որ, բացառությամբ հատուկ համաձայնագրի, իրենք
չեն օգտվի իրենց միջև գործող պայմանագրերից, կոնվենցիաներից կամ հռչակագրերից՝ սույն
Կոնվենցիայի մեկնաբանման կամ կիրառման առնչությամբ ծագած վեճը գանգատի միջոցով
կարգավորման այլ միջոցների ներկայացնելու նպատակով, քան նրանք, որոնք նախատեսված են սույն
Կոնվենցիայով:
Հոդված 56
Տարածքային կիրառումը
1. Ցանկացած պետություն վավերացնելիս կամ հետագայում ցանկացած ժամանակ կարող է Եվրոպայի
խորհրդի Գլխավոր քարտուղարին ծանուցելու միջոցով հայտարարել, որ սույն Կոնվենցիան, սույն
հոդվածի 4-րդ կետի համաձայն, տարածվում է այն բոլոր տարածքների կամ դրանցից ցանկացածի վրա,
որոնց միջազգային հարաբերությունների համար ինքը պատասխանատու է:
2. Կոնվենցիայի գործողությունը ծանուցագրի մեջ նշված տարածքի կամ տարածքների վրա տարածվում է
այդ ծանուցագիրը Եվրոպայի խորհրդի Գլխավոր քարտուղարի կողմից ստանալուց հետո 30-րդ օրվանից:
3. Սույն Կոնվենցիայի դրույթները հիշյալ տարածքներում կիրառվում են՝ պատշաճորեն հաշվի առնելով
տեղական պահանջները:
4. Ցանկացած պետություն, որը սույն հոդվածի 1-ին կետին համապատասխան հայտարարություն է
կատարել, հետագայում ցանկացած ժամանակ կարող է մեկ կամ մի քանի տարածքների անունից, որոնց
վերաբերում է այդ հայտարարությունը, հայտարարել, որ ինքը ճանաչում է անհատներից, ոչ
կառավարական կազմակերպություններից կամ անձանց խմբերից գանգատներ ստանալու Դատարանի
իրավասությունը, ինչպես որ դա նախատեսված է Կոնվենցիայի 34-րդ հոդվածով:
Հոդված 57
Վերապահումները
1. Ցանկացած պետություն, սույն Կոնվենցիան ստորագրելիս կամ վավերագիրն ի պահ հանձնելիս,
կարող է վերապահում անել Կոնվենցիայի ցանկացած դրույթի վերաբերյալ այն առումով, որ այդ
ժամանակ իր տարածքում գործող այս կամ այն օրենքը չի համապատասխանում այդ դրույթին: Սույն
հոդվածը ընդհանուր բնույթի վերապահումներ չի թույլատրում:
2. Սույն հոդվածի դրույթներին համապատասխան կատարված ցանկացած վերապահում պետք է
բովանդակի համապատասխան օրենքի հակիրճ շարադրանքը:
Հոդված 58
Չեղյալ հայտարարումը
1. Բարձր պայմանավորվող կողմը կարող է սույն Կոնվենցիան չեղյալ հայտարարել Կոնվենցիային
մասնակից դառնալու պահից սկսած հինգ տարի անց միայն և Եվրոպայի խորհրդի Գլխավոր
քարտուղարին ծանուցում ուղարկելու պահից սկսած վեց ամիսը լրանալուց հետո. Գլխավոր
քարտուղարն այդ մասին իրազեկ է պահում մյուս Բարձր պայմանավորվող կողմերին:
2. Չեղյալ հայտարարելը համապատասխան Բարձր պայմանավորվող կողմին չի ազատում սույն
Կոնվենցիայով ստանձնած իր պարտավորություններից ցանկացած գործողության կապակցությամբ, որը
կարող էր այդ պարտավորությունների խախտում լինել և նրա կողմից կատարվել մինչև չեղյալ
հայտարարման ուժի մեջ մտնելու ժամկետը:
3. Ցանկացած Բարձր պայմանավորվող կողմ, որը դադարում է Եվրոպայի խորհրդի անդամ լինել, նույն
պայմաններով դադարում է սույն Կոնվենցիայի մասնակից լինել:
4. Կոնվենցիան կարող է, նախորդ կետերի դրույթներին համապատասխան, չեղյալ հայտարարվել
ցանկացած տարածքի նկատմամբ, որի վրա տարածվում է նրա գործողությունը 56-րդ հոդվածի
դրույթների համաձայն:
Հոդված 59
Ստորագրումը և վավերացումը
1. Սույն Կոնվենցիան բաց է ստորագրման Եվրոպայի խորհրդի անդամ պետությունների համար: Այն
ենթակա է վավերացման: Վավերագրերն ի պահ են հանձնվում Եվրոպայի խորհրդի Գլխավոր
քարտուղարին:
2. Սույն Կոնվենցիան ուժի մեջ է մտնում տասներորդ վավերագիրն ի պահ հանձնելուց հետո:
3. Կոնվենցիան ստորագրած այն պետությունների համար, որոնք Կոնվենցիան վավերացնելու են
հետագայում, վերջինս ուժի մեջ է մտնում նրանց վավերագրերն ի պահ հանձնելու ամսաթվից:
4. Եվրոպայի խորհրդի Գլխավոր քարտուղարը Եվրոպայի խորհրդի բոլոր անդամ պետություններին
ծանուցում է Կոնվենցիայի ուժի մեջ մտնելու, այն վավերացրած Բարձր պայմանավորվող կողմերի և
բոլոր վավերագրերի ի պահ հանձնման մասին, որոնք կարող են ստացվել հետագայում:
Կնքված է Հռոմում, 1950թ. նոյեմբերի 4-ին, անգլերեն և ֆրանսերեն, երկու տեքստերն էլ հավասարազոր
են, մեկ օրինակով, որը պահվում է Եվրոպայի խորհրդի արխիվում: Գլխավոր քարտուղարը
հավաստագրված պատճեններն ուղարկում է Կոնվենցիան ստորագրած բոլոր պետություններին:
ԱՐՁԱՆԱԳՐՈՒԹՅՈՒՆ
Մարդու իրավունքների և հիմնական ազատությունների պաշտպանության մասին
կոնվենցիայի
(Փարիզ, 1952 մարտի 20)
Սույն Արձանագրությունը ստորագրած կառավարությունները, լինելով Եվրոպայի խորհրդի անդամներ,
լի վճռականությամբ՝ ձեռնարկելու որոշ այնպիսի իրավունքների և ազատությունների կոլեկտիվ
իրականացումն ապահովող քայլեր, որոնք այլ են, քան 1950թ. նոյեմբերի 4-ին Հռոմում ստորագրված
Մարդու իրավունքների և հիմնական ազատությունների պաշտպանության մասին կոնվենցիայի
(այսուհետ՝ Կոնվենցիա) I բաժնում արդեն ընդգրկվածները,
համաձայնեցին ներքոհիշյալի շուրջ.
Հոդված 1
Սեփականության պաշտպանություն
Յուրաքանչյուր ֆիզիկական կամ իրավաբանական անձ ունի իր գույքից անարգել օգտվելու իրավունք։ Ոչ
ոքի չի կարելի զրկել իր գույքից, բացառությամբ այն դեպքերի, երբ դա կատարվում է ի շահ հանրության և
այն պայմաններով, որոնք նախատեսված են օրենքով ու միջազգային իրավունքի ընդհանուր
սկզբունքներով։
Նախորդ դրույթները, այնուամենայնիվ, չեն խոչընդոտում պետության՝ այնպիսի օրենքներ կիրառելու
իրավունքին, որոնք նա անհրաժեշտ է համարում, իր հիմնական շահերին համապատասխան,
սեփականության օգտագործման նկատմամբ վերահսկողություն իրականացնելու կամ հարկերի կամ
մյուս տուրքերի կամ տուգանքների վճարումն ապահովելու համար։
Հոդված 2
Կրթության իրավունք
Ոչ ոքի չի կարելի մերժել կրթության իրավունքը։ Պետությունը, կրթության և ուսուցման բնագավառում իր
ստանձնած ցանկացած գործառույթ իրականացնելիս, հարգում է ծնողների՝ զավակների համար իրենց
կրոնական ու փիլիսոփայական համոզմունքներին համապատասխան կրթություն ու ուսուցում
ապահովելու իրավունքը։
Հոդված 3
Ազատ ընտրությունների իրավունք
Բարձր պայմանավորվող կողմերը պարտավորվում են անցկացնել ազատ ընտրություններ՝ ողջամիտ
պարբերականությամբ, գաղտնի քվեարկությամբ, այնպիսի պայմաններում, որոնք ապահովեն ժողովրդի
կամքի ազատ արտահայտումն օրենսդիր իշխանություն ընտրելիս։
Հոդված 4
Տարածքային կիրառումը
Ցանկացած Բարձր պայմանավորվող կողմ կարող է ստորագրելիս կամ վավերացնելիս կամ դրանից
հետո ցանկացած ժամանակ Եվրոպայի խորհրդի Գլխավոր քարտուղարին հղել հայտարարություն՝
նշելով այն շրջանակները, որի սահմաններում ինքը պարտավորվում է կիրառել սույն Արձանագրության
դրույթները այն տարածքների նկատմամբ, որոնց միջազգային հարաբերությունների համար ինքը
պատասխանատու է։
Ցանկացած Բարձր պայմանավորվող կողմ, որը նախորդ կետին համապատասխան հայտարարություն է
հղել, կարող է ժամանակ առ ժամանակ հետագա հայտարարություն հղել՝ ցանկացած նախորդ
հայտարարության պայմանների փոփոխման կամ ցանկացած տարածքի նկատմամբ սույն
Արձանագրության դրույթների կիրառման դադարեցման մասին։
Սույն հոդվածին համապատասխան արված հայտարարությունը դիտվում է որպես Կոնվենցիայի 56-րդ
հոդվածի 1-ին կետին համապատասխան արված հայտարարություն։
Հոդված 5
Հարաբերակցությունը Կոնվենցիայի հետ
Բարձր պայմանավորվող կողմերի հարաբերություններում սույն Արձանագրության 1, 2, 3 և 4-րդ
հոդվածների դրույթները դիտվում են որպես Կոնվենցիայի լրացուցիչ հոդվածներ, և Կոնվենցիայի բոլոր
դրույթները կիրառվում են համապատասխանաբար։
Հոդված 6
Ստորագրումը և վավերացումը
Սույն Արձանագրությունը բաց է ստորագրման Եվրոպայի խորհրդի այն անդամների համար, որոնք
ստորագրել են Կոնվենցիան. այն ենթակա է վավերացման՝ Կոնվենցիայի վավերացման հետ
միաժամանակ կամ այն վավերացնելուց հետո։ Արձանագրությունն ուժի մեջ է մտնում տասներորդ
վավերագիրն ի պահ հանձնելուց հետո։ Հետագայում վավերացնող ցանկացած ստորագրող պետության
համար Արձանագրությունն ուժի մեջ է մտնում նրա վավերագիրն ի պահ հանձնելու պահից։
Վավերագրերն ի պահ են հանձնվում Եվրոպայի խորհրդի Գլխավոր քարտուղարին, որը
վավերացումների մասին ծանուցում է բոլոր անդամներին։
Կատարված է Փարիզում, 1952թ. մարտի 20-ին, անգլերեն և ֆրանսերեն, երկու տեքստերն էլ
հավասարազոր են, մեկ օրինակով, որը պահվում է Եվրոպայի խորհրդի արխիվներում։ Գլխավոր
քարտուղարը հավաստված պատճեններն ուղարկում է Արձանագրությունն ստորագրած յուրաքանչյուր
կառավարությանը:
ԱՐՁԱՆԱԳՐՈՒԹՅՈՒՆ ԹԻՎ 4
Մարդու իրավունքների և հիմնական ազատությունների պաշտպանության մասին
կոնվենցիայի՝ որոշ այնպիսի իրավունքների և ազատությունների ապահովման մասին,
որոնք այլ են, քան կոնվենցիայի և նրան կից թիվ առաջի Արձանագրության մեջ ադեն
ընդգրկվածները
(Ստրասբուրգ, 1963 թ. նոյեմբերի 16)
Սույն Արձանագրությունն ստորագրած կառավարությունները, լինելով Եվրոպայի խորհրդի անդամներ,
լի վճռականությամբ՝ ձեռնարկելու որոշ այնպիսի իրավունքների և ազատությունների կոլեկտիվ
իրականացումն ապահովող քայլեր, որոնք այլ են, քան 1950թ. նոյեմբերի 4-ին Հռոմում ստորագրված
Մարդու իրավունքների և հիմնական ազատությունների պաշտպանության մասին կոնվենցիայի
(այսուհետ՝ Կոնվենցիա) I բաժնում և նրան կից՝ 1952 թ. մարտի 20-ին Փարիզում ստորագրված թիվ 1
Արձանագրության 1-3 հոդվածներում արդեն ընգրկվածները,
համաձայնեցին ներքոհիշյալի շուրջ.
Հոդված 1
Պարտքի համար ազատազրկման արգելումը
Ոչ ոքի չի կարելի ազատությունից զրկել միայն այն պատճառով, որ ի վիճակի չէ կատարելու
պայմանագրային որևէ պարտավորություն:
Հոդված 2
Տեղաշարժի ազատությունը
1. Որևէ պետության տարածքում օրինական կարգով գտնվող յուրաքանչյուր ոք ունի այդ տարածքի
սահմաններում ազատ տեղաշարժվելու և ազատորեն բնակության վայր ընտրելու իրավունք:
2. Յուրաքանչյուր ոք ունի ցանկացած, ներառյալ իր սեփական, երկրից հեռանալու իրավունք։
3. Այդ իրավունքների իրականացման նկատմամբ չպետք է կիրառվի որևէ սահմանափակում,
բացառությամբ այն սահմանափակումների, որոնք նախատեսված են օրենքով և անհրաժեշտ են
ժողովրդավարական հասարակությունում՝ ի շահ պետական անվտանգության կամ հասարակական
անդորրի, հասարակական կարգի պահպանման, հանցագործությունների կանխման, առողջության կամ
բարոյականության պաշտպանության կամ այլ անձանց իրավունքների ու ազատությունների
պաշտպանության նպատակով:
4. 1-ին կետում շարադրված իրավունքները ևս կարող են որոշ ոլորտներում ենթարկվել
սահմանափակումների, որոնք կիրառվում են օրենքին համապատասխան և հիմնավորվում
ժողովրդավարական հասարակության հասարակական շահերով:
Հոդված 3
Քաղաքացիների արտաքսման արգելումը
1. Ոչ ոքի չի կարելի անհատապես կամ կոլեկտիվ կերպով արտաքսել այն պետության տարածքից, որի
քաղաքացին է նա:
2. Ոչ ոքի չի կարելի զրկել այն պետության տարածք մուտք գործելու իրավունքից, որի քաղաքացին է նա:
Հոդված 4
Օտարերկրացիների կոլեկտիվ արտաքսման արգելումը
Օտարերկրացիների կոլեկտիվ արտաքսումն արգելվում է:
Հոդված 5
Տարածքային կիրառումը
1. Ցանկացած Բարձր պայմանավորվող կողմ կարող է սույն Արձանագրությունը ստորագրելիս կամ
վավերացնելիս կամ դրանից հետո ցանկացած ժամանակ Եվրոպայի խորհրդի Գլխավոր քարտուղարին
հղել հայտարարություն՝ նշելով այն շրջանակները, որի սահմաններում ինքը պարտավորվում է կիրառել
սույն Արձանագրության դրույթները այն տարածքների նկատմամբ, որոնց միջազգային
հարաբերությունների համար ինքը պատասխանատու է։
2. Ցանկացած Բարձր պայմանավորվող կողմ, որը նախորդ կետին համապատասխան հայտարարություն
է հղել, կարող է ժամանակ առ ժամանակ հետագա հայտարարություններ հղել ցանկացած նախորդ
հայտարարության պայմանների փոփոխման կամ ցանկացած տարածքի նկատմամբ սույն
Արձանագրության դրույթների կիրառման դադարեցման մասին։
3. Սույն հոդվածին համապատասխան արված հայտարարությունը դիտվում է որպես Կոնվենցիայի 56-րդ
հոդվածի 1-ին կետին համապատասխան արված հայտարարություն։
4. Ցանկացած պետության տարածք, որի նկատմամբ սույն Արձանագրությունը կիրառվում է այդ
պետության կողմից այն վավերացնելու կամ ընդունելու ուժով, և ցանկացած տարածք, որի նկատմամբ
սույն Արձանագրությունը կիրառվում է սույն հոդվածին համապատասխան այդ պետության
հայտարարության ուժով, 2-րդ և 3-րդ հոդվածների նպատակների համար համարվում է ինքնուրույն
տարածք:
5. Յուրաքանչյուր պետություն, որը սույն հոդվածի 1-ին կամ 2-րդ կետերի համաձայն հայտարարություն
է արել, դրանից հետո ցանկացած ժամանակ կարող է մեկ կամ մի քանի տարածքների անունից, որոնց
վերաբերում է հայտարարությունը, հայտարարել, որ ինքն ընդունում է Դատարանի՝ առանձին
անձանցից, ոչ կառավարական կազմակերպությունների կամ անձանց խմբերից սույն Արձանագրության
1-4 բոլոր կամ ցանկացած հոդվածների կապակցությամբ Կոնվենցիայի 34-րդ հոդվածով նախատեսված
գանգատներ ստանալու իրավասությունը։
Հոդված 6
Հարաբերակցությունը Կոնվենցիայի հետ
Բարձր պայմանավորվող կողմերի հարաբերություններում սույն Արձանագրության 1-5 հոդվածների
դրույթները դիտվում են որպես Կոնվենցիայի լրացուցիչ հոդվածներ, և Կոնվենցիայի բոլոր դրույթները
կիրառվում են համապատասխանաբար:
Հոդված 7
Ստորագրումը և վավերացումը
1. Սույն Արձանագրությունը բաց է ստորագրման Եվրոպայի խորհրդի այն անդամների համար, որոնք
ստորագրել են Կոնվենցիան. այն ենթակա է վավերացման Կոնվենցիայի վավերացման հետ
միաժամանակ կամ այն վավերացնելուց հետո։ Արձանագրությունն ուժի մեջ է մտնում հինգերորդ
վավերագիրն ի պահ հանձնելուց հետո: Հետագայում վավերացնող ցանկացած ստորագրող պետության
համար Արձանագրությունն ուժի մեջ է մտնում նրա վավերագիրն ի պահ հանձնելու պահից:
2. Վավերագրերն ի պահ են հանձնվում Եվրոպայի խորհրդի Գլխավոր քարտուղարին, որը
վավերացումների մասին ծանուցում է բոլոր անդամներին:
Ի հավաստումն որի՝ պատշաճ կերպով լիազորված ներքոստորագրյալներն ստորագրեցին սույն
Արձանագրությունը:
Կատարված է Ստրասբուրգում, 1963 թ. սեպտեմբերի 16-ին, անգլերեն և ֆրանսերեն, երկու տեքստերն էլ
հավասարազոր են, մեկ օրինակով, որը պահվում է Եվրոպայի խորհրդի արխիվում: Գլխավոր
քարտուղարը հավաստված պատճեններն ուղարկում է Արձանագրությունն ստորագրած յուրաքանչյուր
պետությանը:
ԱՐՁԱՆԱԳՐՈՒԹՅՈՒՆ ԹԻՎ 6
Մարդու իրավունքների և հիմնական ազատությունների պաշտպանության մասին
կոնվենցիայի՝
Մահապատժի վերացման վերաբերյալ
(Ստրասբուրգ, 1983 թ. ապրիլի 28)
Եվրոպայի խորհրդի անդամ պետությունները, որոնք ստորագրել են 1950թ. նոյեմբերի 4-ին Հռոմում
ստորագրված Մարդու իրավունքների և հիմնական ազատությունների պաշտպանության մասին
Կոնվենցիային (այսուհետ՝ Կոնվենցիա) կից սույն Արձանագրությունը,
նկատի առնելով, որ Եվրոպայի խորհրդի անդամ որոշ պետություններում տեղի ունեցած զարգացումն
արտահայտում է մահապատիժը վերացնելու օգտին առկա ընդհանուր միտումը,
համաձայնեցին ներքոհիշյալի շուրջ.
Հոդված 1
Մահապատժի վերացումը
Մահապատիժը վերացվում է: Ոչ ոքի չի կարելի մահապատժի դատապարտել կամ մահապատժի
ենթարկել:
Հոդված 2
Մահապատիժը պատերազմի ժամանակ
Պետությունը կարող է իր օրենսդրության մեջ մահապատիժ նախատեսել պատերազմի ժամանակ կամ
պատերազմի անխուսափելի սպառնալիքի դեպքում կատարված գործողությունների համար. նման
պատիժը կիրառվում է միայն օրենքով սահմանված դեպքերում և նրա դրույթներին համապատասխան:
Պետությունը Եվրոպայի խորհրդի Գլխավոր քարտուղարին հաղորդում է այդ օրենսդրության
համապատասխան դրույթները:
Հոդված 3
Շեղումների արգելումը
Սույն Արձանագրության դրույթներից շեղումներ չեն թույլատրվում Կոնվենցիայի 15-րդ հոդվածի հիման
վրա:
Հոդված 4
Վերապահումների արգելումը
Սույն Արձանագրության դրույթների նկատմամբ վերապահումներ չեն թույլատրվում Կոնվենցիայի 57-րդ
հոդվածի հիման վրա:
Հոդված 5
Տարածքային կիրառումը
1. Ցանկացած պետություն ստորագրելիս կամ վավերագիրը, ընդունման կամ հավանություն տալու
մասին փաստաթուղթն ի պահ հանձնելիս կարող է նշել այն տարածքը կամ տարածքները, որոնց
նկատմամբ կիրառվում է սույն Արձանագրությունը:
2. Ցանկացած պետություն կարող է ավելի ուշ, ցանկացած պահի, Եվրոպայի խորհրդի Գլխավոր
քարտուղարին հղած հայտարարությամբ, սույն Արձանագրության կիրառումը տարածել
հայտարարության մեջ նշված որևէ այլ տարածքի նկատմամբ: Այդ տարածքի նկատմամբ
Արձանագրությունն ուժի մեջ է մտնում Գլխավոր քարտուղարի կողմից նման հայտարարություն
ստանալու ամսաթվին հաջորդող ամսվա առաջին օրը:
3. Նախորդ երկու կետերի հիման վրա արված ցանկացած հայտարարություն, որը վերաբերում է նրանում
նշված այս կամ այն տարածքին, կարող է չեղյալ հայտարարվել Գլխավոր քարտուղարին ուղարկած
ծանուցագրի միջոցով: Չեղյալ հայտարարումն ուժի մեջ է մտնում այն ամսվա առաջին օրվանից, որը
հաջորդում է Գլխավոր քարտուղարի կողմից նման ծանուցագիրն ստանալու ամսաթվին:
Հոդված 6
Հարաբերակցությունը Կոնվենցիայի հետ
Մասնակից պետությունների հարաբերություններում սույն Արձանագրության 1-ին և 5-րդ հոդվածները
դիտվում են որպես Կոնվենցիայի լրացուցիչ հոդվածներ, և Կոնվենցիայի բոլոր դրույթները կիրառվում են
համապատասխանաբար:
Հոդված 7
Ստորագրումը և վավերացումը
Սույն Արձանագրությունը բաց է ստորագրման Կոնվենցիան ստորագրած Եվրոպայի խորհրդի անդամ
պետությունների համար: Այն ենթակա է վավերացման, ընդունման կամ հաստատման: Եվրոպայի
խորհրդի անդամ պետությունը չի կարող սույն Արձանագրությունը վավերացնել, ընդունել կամ
հաստատել՝ առանց միաժամանակ կամ դրանից առաջ Կոնվենցիան վավերացնելու: Վավերագրերը,
ընդունման կամ հաստատման փաստաթղթերն ի պահ են հանձնվում Եվրոպայի խորհրդի Գլխավոր
քարտուղարին:
Հոդված 8
Ուժի մեջ մտնելը
1. Սույն Արձանագրությունն ուժի մեջ է մտնում այն ամսաթվին հաջորդող ամսվա առաջին օրը, երբ
Եվրոպայի խորհրդի անդամ հինգ պետություններ, 7-րդ հոդվածի դրույթներին համապատասխան, իրենց
համաձայնությունն են արտահայտում Արձանագրությամբ պարտավորություններ ստանձնելու
կապակցությամբ:
2. Ցանկացած անդամ պետության համար, որն Արձանագրությամբ պարտավորություն ստանձելու իր
համաձայնությունը հայտնում է հետագայում, Արձանագրությունն ուժի մեջ է մտնում այն ամսվա
առաջին օրվանից, որը հաջորդում է վավերագիրը կամ ընդունման կամ հաստատման փաստաթուղթն ի
պահ հանձնելու օրվան:
Հոդված 9
Ավանդապահի գործառույթները
Եվրոպայի խորհրդի Գլխավոր քարտուղարը Խորհրդի անդամ պետություններին ծանուցում է՝
a. ցանկացած ստորագրման մասին,
b. վավերագիրը, ընդունման կամ հաստատման փաստաթուղթն ի պահ հանձնելու մասին,
c. 5 և 8-րդ հոդվածներին համապատասխան՝ սույն Արձանագրության ուժի մեջ մտնելու օրվա մասին,
d. սույն Արձանագրությանը վերաբերող ցանկացած այլ գործողության, ծանուցման կամ
հայտարարության մասին:
Ի հավաստումն որի՝ պատշաճ կերպով լիազորված ներքոստորագրյալներն ստորագրեցին սույն
Արձանագրությունը:
Կատարված է Ստրասբուրգում, 1983թ. ապրիլի 28-ին, անգլերեն և ֆրանսերեն, երկու տեքստերն էլ
հավասարազոր են, մեկ օրինակով, որը պահվում է Եվրոպայի խորհրդի արխիվում: Եվրոպայի խորհրդի
Գլխավոր քարտուղարը հաստատված պատճեններն ուղարկում է Եվրոպայի խորհրդի անդամ
յուրաքանչյուր պետությանը:
ԱՐՁԱՆԱԳՐՈՒԹՅՈՒՆ ԹԻՎ 7
Մարդու իրավունքների և հիմնական ազատությունների
պաշտպանության մասին կոնվենցիայի
(Ստրասբուրգ, 1984 թ. նոյեմբերի 22)
Եվրոպայի խորհրդի անդամ պետությունները, որոնք ստորագրել են սույն Արձանագրությունը,
լի վճռականությամբ՝ ձեռնարկելու այնպիսի քայլեր, որոնք ապահովեն որոշ իրավունքների և
ազատությունների կոլեկտիվ իրականացումը 1950թ. նոյեմբերի 4-ին Հռոմում ստորագրված Մարդու
իրավունքների և հիմնական ազատությունների պաշտպանության մասին Կոնվենցիայի (այսուհետ՝
Կոնվենցիա) միջոցով,
համաձայնեցին ներքոհիշյալի շուրջ.
Հոդված 1
Օտարերկրացիների արտաքսմանը վերաբերող
ընթացակարգային երաշխիքները
1. Որևէ պետության տարածքում օրինական կարգով բնակվող օտարերկրացին չի կարող այնտեղից
արտաքսվել այլ կերպ, քան ի կատարումն օրենքին համապատասխան ընդունված որոշման, և պետք է
հնարավորություն ունենա՝
a.փաստարկներ ներկայացնելու իր արտաքսման դեմ,
b. վերանայել տալու իր գործը, և
c. այդ նպատակով ներկայացվելու իրավասու մարմնի կամ այդ մարմնի նշանակած մեկ կամ մի քանի
անձանց առջև:
2. Օտարերկրացին կարող է արտաքսվել նախքան սույն հոդվածի 1-ին կետի (a), (b) և (c) ենթակետերում
նշված իր իրավունքների իրականացումը, եթե արտաքսումն անհրաժեշտ է ի շահ հասարակական կարգի
կամ պատճառաբանվում է պետական անվտանգության նկատառումներով:
Հոդված 2
Քրեական գործերով գանգատարկման իրավունքը
1.Քրեական հանցագործություն կատարելու համար դատարանի կողմից դատապարտված յուրաքանչյուր
ոք իրավունք ունի, որպեսզի իր դատապարտումը կամ դատավճիռը վերանայի վերադաս դատական
ատյանը: Այդ իրավունքի իրականացումը, ներառյալ դրա իրականացման հիմքերը, կարգավորվում է
օրենքով:
2. Այդ իրավունքից կարող են բացառություններ արվել օրենքով սահմանված աննշան
հանցագործությունների առնչությամբ կամ երբ տվյալ անձը դատվել է ամենաբարձր ատյանի կողմից, որը
հանդես է եկել որպես առաջին ատյանի դատարան, կամ դատապարտված է եղել այդ անձի
արդարացման դեմ վճռաբեկ գանգատի քննարկումից հետո:
Հոդված 3
Փոխհատուցումը սխալ դատապարտման դեպքում
Եթե որևէ անձ վերջնական դատավճռով մեղավոր է ճանաչվել քրեական հանցագործություն կատարելու
մեջ և եթե հետագայում նրա նկատմամբ կայացված դատավճիռը չեղյալ է հայտարարվել կամ նա ներման
է ենթարկվել այն հիմքով, որ նոր կամ նոր բացահայտված որևէ փաստ համոզիչ կերպով ապացուցում է
դատական սխալի առկայությունը, ապա նման դատապարտման հետևանքով պատիժ կրած անձը
փոխհատուցում է ստանում տվյալ պետության օրենքին համապատասխան կամ պրակտիկայի
համաձայն, եթե չի ապացուցվում, որ ժամանակին այդ փաստը չբացահայտելը լիովին կամ մասամբ
կախված չի եղել տվյալ անձից:
Հոդված 4
Կրկին անգամ չդատվելու և չպատժվելու իրավունքը
1.Ոչ ոք չպետք է միևնույն պետության իրավազորության շրջանակներում երկրորդ անգամ դատվի կամ
քրեական դատավարության կարգով պատժվի այն հանցագործության կապակցությամբ, որի համար նա
արդեն վերջնականապես արդարացվել է կամ դատապարտվել այդ պետության օրենքին և քրեական
դատավարությանը համապատասխան։
2. Նախորդ կետի դրույթները չեն խոչընդոտում գործի վերանայմանը տվյալ պետության օրենքին և
քրեական դատավարությանը համապատասխան, եթե ի հայտ են եկել նոր կամ նոր բացահայտված
փաստեր կամ նախորդ քննության ժամանակ տեղ են գտել էական թերություններ, որոնք կարող էին
ազդել դրա արդյունքի վրա։
3. Սույն հոդվածի դրույթներից շեղում չի թույլատրվում Կոնվենցիայի 15-րդ հոդվածի հիման վրա։
Հոդված 5
Հավասարությունն ամուսինների միջև
Ամուսնանալիս, ամուսնության ընթացքում և ամուսնալուծության դեպքում ամուսինները հավասար
իրավունքներ և մասնավոր իրավական բնույթի հավասար պատասխանատվություն ունեն փոխադարձ
հարաբերություններում և իրենց երեխաների հետ ունեցած հարաբերություններում։ Սույն հոդվածը
պետություններին չի խոչընդոտում ձեռնարկելու այնպիսի միջոցներ, որոնք անհրաժեշտ են երեխաների
շահերը պաշտպանելու համար։
Հոդված 6
Տարածքային կիրառումը
1. Ցանկացած պետություն ստորագրելիս կամ իր վավերագիրը կամ ընդունման կամ հավանություն
տալու մասին փաստաթուղթն ի պահ հանձնելիս կարող է նշել այն տարածքը կամ տարածքները, որոնց
վրա տարածվում է սույն Արձանագրության գործողությունը, և նշել այն ծավալը, որով տվյալ
պետությունը պարտավորվում է սույն Արձանագրության դրույթները կիրառել այդ տարածքի կամ
տարածքների նկատմամբ։
2. Ցանկացած պետություն կարող է ավելի ուշ, ցանկացած պահի, Եվրոպայի խորհրդի Գլխավոր
քարտուղարին հղած հայտարարությամբ, սույն Արձանագրության կիրառումը տարածել
հայտարարության մեջ նշված որևէ այլ տարածքի վրա։ Այդ տարածքի նկատմամբ Արձանագրությունն
ուժի մեջ է մտնում այն ամսվա առաջին օրվանից, որն սկսվում է Գլխավոր քարտուղարի կողմից նման
հայտարարություն ստանալու ամսաթվին հաջորդող երկամսյա ժամկետի լրանալուց հետո։
3.Նախորդ երկու կետերի հիման վրա արված ցանկացած հայտարարություն, որը վերաբերում է նրանում
նշված այս կամ այն տարածքին, կարող է չեղյալ հայտարարվել կամ փոփոխվել Գլխավոր քարտուղարին
ծանուցելու միջոցով։ Չեղյալ հայտարարումը կամ փոփոխվելն ուժի մեջ է մտնում այն ամսվա առաջին
օրը, որն սկսվում է Գլխավոր քարտուղարի կողմից նման ծանուցագիրն ստանալու ամսաթվին հաջորդող
երկամսյա ժամկետի լրանալուց հետո։
4. Սույն հոդվածի համապատասխան արված հայտարարությունը դիտվում է որպես Կոնվենցիայի 56-րդ
հոդվածի 1-ին կետին համապատասխան արված հայտարարություն։
5. Ցանկացած պետության տարածք, որի նկատմամբ սույն Արձանագրությունը կիրառվում է այդ
պետության կողմից այն վավերացնելու, ընդունելու կամ հաստատելու ուժով, և ցանկացած տարածք, որի
նկատմամբ սույն Արձանագրությունը կիրառվում է այդ պետության՝ սույն հոդվածին համապատասխան
արված հայտարարության ուժով, 1-ին հոդվածում պետության տարածքը վկայակոչելու նպատակով
կարող են դիտվել որպես առանձին տարածքներ։
6. Յուրաքանչյուր պետություն, որը սույն հոդվածի 1-ին կամ 2-րդ կետերի համաձայն հայտարարություն
է արել, դրանից հետո ցանկացած ժամանակ կարող է մեկ կամ մի քանի տարածքների անունից, որոնց
վերաբերում է հայտարարությունը, հայտարարել, որ ինքն ընդունում է Դատարանի՝ առանձին
անձանցից, ոչ կառավարական կազմակերպություններից կամ անձանց խմբերից՝ սույն Արձանագրության
1-5 հոդվածների կապակցությամբ Կոնվենցիայի 34-րդ հոդվածով նախատեսված գանգատներ ստանալու
իրավասությունը։
Հոդված 7
Հարաբերակցությունը Կոնվենցիայի հետ
Մասնակից պետությունների հարաբերություններում սույն Արձանագրության 1-6 հոդվածները դիտվում
են որպես Կոնվենցիայի լրացուցիչ հոդվածներ, և Կոնվենցիայի բոլոր դրույթները կիրառվում են
համապատասխանաբար։
Հոդված 8
Ստորագրումը և վավերացումը
Սույն Արձանագրությունը բաց է ստորագրման Կոնվենցիան ստորագրած Եվրոպայի խորհրդի անդամ
պետությունների համար։ Այն ենթակա է վավերացման, ընդունման կամ հաստատման։ Եվրոպայի
խորհրդի անդամ պետությունը չի կարող սույն Արձանագրությունը վավերացնել, ընդունել կամ
հաստատել՝ առանց միաժամանակ կամ դրանից առաջ Կոնվենցիան վավերացնելու։ Վավերագրերը,
ընդունման կամ հաստատման փաստաթղթերն ի պահ են հանձնվում Եվրոպայի խորհրդի Գլխավոր
քարտուղարին։
Հոդված 9
Ուժի մեջ մտնելը
1.Սույն Արձանագրությունն ուժի մեջ է մտնում այն երկամսյա ժամկետի լրանալուն հաջորդող ամսվա
առաջին օրը, երբ Եվրոպայի խորհրդի անդամ յոթ պետություն, 8-րդ հոդվածի համապատասխան, իրենց
համաձայնությունն են հայտնում սույն Արձանագրությամբ պարտավորություններ ստանձնելու
կապակցությամբ։
2.Ցանկացած անդամ պետության համար, որն Արձանագրությամբ պարտավորություն ստանձնելու իր
համաձայնությունը հայտնում է հետագայում, այն ուժի մեջ է մտնում վավերագիրը կամ ընդունման կամ
հաստատման փաստաթղթերն ի պահ հանձնելուց հետո երկամսյա ժամկետի լրանալուն հաջորդող
ամսվա առաջին օրվանից։
Հոդված 10
Ավանդապահի գործառույթները
Եվրոպայի խորհրդի Գլխավոր քարտուղարը Եվրոպայի խորհրդի անդամ բոլոր պետություններին
ծանուցում է՝
a. ցանկացած ստորագրման մասին, հավանության արժանացման,
b. վավերագիրը, ընդունման կամ փաստաթուղթն ի պահ հանձնելու մասին,
c. 6 և 9-րդ հոդվածներին համապատասխան՝ սույն Արձանագրության ուժի մեջ մտնելու օրվա մասին,
d. սույն Արձանագրությանը վերաբերող ցանկացած այլ գործողության, ծանուցման կամ
հայտարարության մասին։
Ի հավաստումն որի՝ պատշաճ կերպով լիազորված ներքոստորագրյալներն ստորագրեցին սույն
Արձանագրությունը։
Կատարված է Ստրասբուրգում, 1984 թ. նոյեմբերի 22-ին, անգլերեն և ֆրանսերեն, երկու տեքստերն էլ
հավասարազոր են, մեկ օրինակով, որը պահվում է Եվրոպայի խորհրդի արխիվում։ Եվրոպայի խորհրդի
Գլխավոր քարտուղարը հաստատված պատճեններն ուղարկում է Եվրոպայի խորհրդի անդամ
յուրաքանչյուր պետությանը։
Աղբյուր՝ www.concourt.am

Комментариев нет :

Отправить комментарий